U TRAVAGGHJU DI CATINA

Travagghju forsi nun si po` considirari
e non picchi è lieggiu o nun c`è di faticari
sulu ca, a sintirini parrari o a taliari l`autri ca lu fannu,
parissi tuttu a scinniri, senza fatica e senza dannu.

Accussì puru iu la pinsava
ma a la fini di ogni jurnata la testa mi furriava.
Di notti strani rumura nta la me testa
parianu tamburina, ma fora nun era festa!.

Chiddu ca avia ad essiri un travagghju “passa tempu”
divintau lestu la me cruci e lu me turmentu.
Nun esseri mancu patruni di iri a pisciari
lu travagghju di catina nun po` aspittari!

Ah!. Quant`è longa na jurnata,
quannu fai sempri la stissa furriata
quannu li dulura ti fannu rallentari
e lu travaggju di catina nun po` aspittari!

Ti lassanu abituari a di ritmi esaspirati
poi allongano lu sucu icannu autri minchiati
“na cosa di nenti!” ti dicinu pi ncuraggiamentu
a tu ca già sai ca finisti di isari lu mentu.

Hannu passatu 20 anni e sugnu ancora cà
tutti li jorna la stissa cosa! ...quanti acciacchi mi purtà!
Ma tiegnu duru e vaiu avanti cu li dulura nta li rini
tutti ci l`hannu cun nuatri comu siddu a lu Signuri c`avissimu chiantatu sulu nuatri li spini.

Quanta genti oramai malata!
anchi si da minenzu c`è puru occhi mala minchiata
di chiddi “travagghjatura” ca si sentinu scarti e ntelliggenti
di chiddi ca vuonnu campari senza fari nenti.

Chisti, ca sunnu la minuranza, cercano tutti li liggi e li liggina
pi cansiarisi di lu travagghju e di la catina
e quannu nun ci appatta subitu su in malatia
picchi a iddi sulu lu stipendiu mentri lu travagghju a chiddi comu a mia.

Staiu parrannu di li chiù picca, lu dissi prima, la minuranza
li chiossà su sempri dà e non sulu cu la panza
forsi pi da morali o forsi pi l`unuri
o pi l`onestà, lu duviri e la “falsità d`amuri”!

Tanti, però, stannu mali veramenti
e senza sciatari strincinu li dienti
sperannu ca d`accussì lu patruni mostrerà riconoscenza
ca nun su dinari ne onorificenza, ma mancu frustati e obbedienza!

A nuatri nuddu ci pensa
nun c`è liggi, privileggiu o ricompensa.
Li guvirnanti si inchinu la ucca di beddi paroli
e tutti d`accordu fannu chiddu chi lu putenti voli.

Forsi pensanu ca siemu comu l`armali
ca su senza ntellettu e senza morali
ma puru li maiali hannu sintimenti
e soffrinu si li tratti mali continuamenti.

Poi vulissi capiri ma sugnu gnoranti
chiddu mia nun è un travaggju altamenti usuranti?
Finalmenti forsi lu capieru ca è d`accussì
propriu ora ca la fabbrica chiuì.