LU RIMEDIU SOCIALI

Na vota ca `un c`é fasciu,
a tutti li problema
truvamu soluzioni
pi `un gniri a catafasciu.
Rimediu senza tema
puliticu e civili
chiù meggiu nun truvamu
ca fari l`elezioni.
S`addumanu cannili,
si fannu cosi granni
facennu i votazioni.
Si sulu ni parramu,
arrizzanu li canni
p`e cosi ca non vannu
nta vita cittadina,
ma basta `n-elezioni
bedda granni c`o dannu
scumpari comu nennti.
Curremu tutti a coru,
strugghermu na catina
di beddi vutamenti
pi` chiddu ca succedi
e, senza poi strafari,
n`avemu cosi d`oru!
Vutamu sempiternu!
Vutamu tutti quanti,
e granni e picciriddi,
llinchemu china china
la cascia, ch`é vacanti
di cunsensi e votazioni!
Vutamu puru in celu,
vutamu supr`e stiddi,
vutamu boni, boni!
S`aggiustanu li cosi,
senza tantu piniari,
finisci lu sfacelu!
Si pensi ca `un su` rosi,
si pensi ca `un é veru,
si pensi su` minchiati,
tu vota e nun pinsari.