Signiruzzu, chiuviti, chiuviti..

Era di ‘mmiernu, ed ancora carusu,

‘u cielu parìa comu fussi chiusu :

mai ‘na negghia, mancu ‘na muffurata

ppi dari rifrigeriu a lu Criatu.

‘U suli, comu fussi ‘u patruni;

la terra, arsa, jittava vuci e vrami

e ‘u lauri, chiancìa ppi la siti

di li radici sua, quasi appassuti .

‘U viddanu nu’ è ca fussi sulu,

a stari sempri cu’ l’occhi a lu cielu,

a prijari, cu’ li vrazza allargati,

picchì vinissi l’acqua suspirata !

Si scinnieru li Santi di l’Artari,

ppì prijari a Diu di fari chiuvìri,

e tutti misi ‘n fila, ad unu ad unu,

ppì lu paìsi jieru ‘n pricissioni.

‘U Crucifissu, com’è giustu, primu,

l’Addulurata Matri, assai vicinu,

San Giuseppi, ‘u Patri Pruvvidenti,

cu’ Santa Rusulia, un po’ distanti.

‘I fimmIni, cu’ ‘n testa lu sciallinu,

‘i masculi, cu’ li cannili ‘n manu,

tutti a prijari, cu’ pia divuzioni,

ppì la durata di la pricissionini :

” Signuruzzu, chiuviti chiuviti

i laureddi su’ morti di siti.

E si Vui l’acqua nu’ ci la mannati

siemu tutti poviri e scunsulati

e si Vui l’acqua cci la mannati

siemu tutti ricchi e cunsulati.

Deh Matri, ppì to’ Figghiu Addulurata,

saziati la terra tutta cripata.

Deh ! Acqua vuliemu, pani vuliemu

e cu’ tuttu lu cori li ‘nvucamu!

San Giusippuzzu, mannatini tanta

d’inchiri puzzi e surgenti vacanti.

Santa Rusulia, mannatila bona

senza lampiari e luntana di trona.

Tutti a lu Cielu ‘livamu li mani :

Datici l’acqua ca tantu disiamu!

Acqua vuliemu, duranti la notti

grapiti, d’u cielu, ‘i catarratti. “

Turnati li Santi, d’intra li Chiesi:

missi, rusari cu’ voti purmisi.

Sunnu scantati di ‘na mal’annata,

di fari ‘u pitittu, e, ppì ‘na vota,

di nu’ putiri inchiri ‘i cannizzi

e di ‘ncuminciari a nu’fari sfrazzi.

Duoppu tri jiorna , cadìu acqua abbunnanti:

dissiru grazii a Diu e tutti li Santi.

L’annata fu ricca ; favi e furmientu,

ppì sciogghiri i voti, nni diettiru tantu .

E’ vera fidi ca movi ogni cosa,

no’ lignu di Cruci tinutu appisu !

Gioacchino Todaro